La ventana de vuestra ermana
La ventana de vuestra ermana

Los anyos pasan, las memoryas kedan...

La semana pasada; tuve un reportaje por el projekto “LADİNO DATABASE”; kon una mujer aedada, respektavle, enstruida i kapache.

La basa de este projekto; es de ambezar a las jenerasyones vinideras; la vida de los djudyos de todo modo de sivdades de los paises ke bivimos, ambezar las uzansas, las fyestas, las komidas, el modo de bivir de los djudyos antes  sinkuenta, sesenta anyos.

Las kalejas ande moravan, los uzos de arisivir musafires, los kazamyentos, las berith-millas, la vida de las mujeres, lo ke aziyan los shabates i alhades, las relasyones kon el entorno, visinos i paryentes.

Berta Varon nasida en Çanakkale; me konto su vida enteresante ke paso aya en su chikes i manseves, i despues ke se kazo; la vida ke tuvo.

Eya es la ija del haham Salamon Varon (zihrono livraha), ke era el dirijente del kal de Çanakkale.

Me konto munchos faktos enteresantes, durante su vida; ke kero partajar kon vozotros el uno.

Berta Varon era una ijika de dyes anyos kuando paso este evenemento.

En el anyo 1933; el byen konosido Prof. Avram Galante, aviya vijitado Çanakkale komo arkeolojisto; para kontrolar las pyedras de las tombas del simeteryo djudyo.

Berta morava en una kaza, bastante grande de tres etajes. En estando en la guerta, se apersivyo ke un ombre sono la puerta i le demando si es la kaza del Haham Salamon Varon i le disho ande estava su padre.

La ijika respondyo ke estava en el kal.

- “Vas a iyir i le vas a dizir al oyido de tu padre; ke vino el prof. Avram Galante”.

-  Berta se fue en koryendo i le konto al padre lo ke afito.

El padre se emosyono, i koryendo vino a kaza i a la onor del profesor; a la nochada envito a todos los amigos i los yahidimes del kal, a komer a su kaza.

Estuvyeron avlando oras largas.

A la fin el profesor tomo la palavra i disho a esta komunitad:

“ Yo vine aki kon una misyon; i agora vos kero dar un konsejo ke nunka no vos olvidesh.

Tener pasensya por todo, soj lo ke soj; no darvos a entender de lo ke tenej, lo ke posedaj; syempre bivir modestamente. Vos va kontar un pasaje sovre este sujeto”.

Aviya un balo muy grande en el palasyo del rey. La reyna kijo ke le merke una djoya para la noche del balo, i salyeron endjuntos a emplear, i vyeron un aniyo muy valutoso en el djoyero.

Este aniyo  le plazyo muncho a la reyna i lo dezeo absolutamente.

Kuando el rey oyo el presyo; le disho a su mujer, ke es emposivle de merkarlo, porke estava muy karo.

La reyna le embaraso.

La noche del balo; vido ke un djudyo kon la mujer estavan baylando i en el dedo teniya este aniyo valutoso.

 “Mira le disho al rey; esta buena djudiya merko este aniyo; ke tu komo rey no lo puiditez alkansar”.

Dunke, “vos esto repetando ke sepaj ke estaj en un pais ajeno, i ke vos akavidej (korunun) de no azer demonstrasyones en la vida. Esto es un konsejo emportante ke lo tomej en konsiderasyon.”


Şeli GAON