Ehud Olmert dyo su konsentimyento a la liberasyon de 250 prizyoneros Palestinyanos
Ehud Olmert dyo su konsentimyento a la liberasyon de 250 prizyoneros Palestinyanos
Un grande responsavle Israelyano deklaro ke el Primer Ministro Ehud Olmert dyo su aprobasyon para liberar 250 kativos Palestinyanos, a kondisyon ke sean todos del Fatah i no tegan sovre las manos manchas de sangre Judia.
Segun la Gazeta Haaretz, Israel puedra tambyen tener en kuento konsiderasyones umanitaryas, komo la salud deteryorada de munchos prizyoneros a la sigida de un muy largo enkarselamyento.
Es en la Konferansya de Charm- el- Cheik del 25 Junyo pasado, ke Ehud Olmert se engajo a liberar 250 palestinyanos sovre los 11000 ke se topan enkarselados en Israel.
Tambyen es en la mizma djunta kon Mahmud Abbas, en prezensya del Prezidente de Ayifto Hosni Mubarak i del Rey Jordanyano, ke el prometyo de versar al Prezidente del Fatah una partida de los fondos Palestinyanos blokados a la sigida de la viktorya del Hamas en la eleksyon lejislativa. Estos jestos de byenkerensya provan la voluntad del Governo Israelyano de apoyar i ayudar el muevo estado Palestinyano de Sisjordania.