En la “İSTANBUL HUKUK FAKÜLTESİ” grande homenaje dedikado a Selim Kaneti
En la “İSTANBUL HUKUK FAKÜLTESİ” grande homenaje dedikado a Selim Kaneti

19 anyos despues de su muerte, lunes el 21 del mez koryente, una grande seremonia fue organizada en el “Salon de Doktorato”rezervado a las reunyones de alto nivel, de la “Istanbul Hukuk Fakültesi”(Fakultad de Derecho de Estambol) por un muevo homenaje a la memorya del eminente avokato Profesor Doktor Selim Kaneti (de bendicha memorya), arrankado prematuramente a la vida i a la kerensya de su mujer, ijas, yernos i inyetos, ansi ke al grande respekto i enorme apresyasyon de sus kolegas, homologos i elevos, por la valor de sus lavoros i la profundidad de su djuzgamyento ke syempre savia ir mas leshos ke la situasyon prezente.

Segun la opinyon de mi defundo marido, Selim Kaneti, inkorruptivle en su integridad profesyonal, no akseptava nunka de salir de las limites de la Ley,ma por kontra tenia la kapachidad profesyonal de ir asta la ekstrema frontyera de los derechos de sus klientes.

El motivo de esta seremonia fue djustamente la prezentasyon de sus raportos juridikos durante los kongresos internasyonales, rekojidos en un volumen de kaji 900 pajinas, verdadera ensiklopedia ke por un largo tyempo servira de referensya a munchos otros juristos.

El Doyen de la fakultad ansi ke otros profesores i vyejos asistantes, komo tambyen sus dos ijas Ethel Gidon i Miryam Molinas tomaron la palavra para azer su elojyo i kontar lo ke fue la enorme aktividad profesyonal del grande avokato, paralelmente a su vida personal i familyal yena de afektividad i harmonia.

No mos olvidaremos ke el fue el fundador en muestra sivdad, de la “Katedra de Derecho Fiskal” (Maliye ve vergi hukuku).

En desparte de su aktividad universitarya (el konsakrava 26 horas kada semana a sus korsos i fue para munchos avokatos, el grande Maestro ke avyo kaminos muevos), en desparte tambyen de su lavoro profesyonal de grande avokato kontinualmente solisitado por una klientela muy ancha, la kuala tenia una konfiansa absoluta en la djustesa de su djuzgamyento, el era syempre pronto a estudyar kualkyer problema de orden juridiko komo tambyen sosyal konsernando muestra komunidad.

La densita de su aktividad profesyonal no empidyo nunka su partisipasyon a la rezolusyon de los varyos problemas de la kolektividad djudia de muestro payis, la kuala avia topado en el un konsejero i munchas vezes (en sirkunstansyas eksepsyonales) un giador de grande perspikasidad,kudyozo no solo del rezultado immedyato de una desizyon, ma tambyen de lo ke sera su impakto sovre el futuro.

Selim Kaneti era antes de todo un ombre de refleksyon, todo en refuzando de kedar estatiko.El era un ombre de ancha perspektiva i de grande vizyon, todo en guadrandose de kayer en kualkyer iluzyon falsa.

De mezmo, detras del syentifiko avia tambyen en el “el ombre en su humanidad”, le plazia azer una partida de bridge, ir ande amigos, avlar i riir kon eyos. Debasho de una aparensya de rezerva, avia en el un ombre de grande simplisidad,syempre avyerto a kualkyer kestyon, syempre pronto a ayudar, muy sensible a todo lo ke se pasava en su entorno.

 Kuando le demandavan su avizo sovre kualkyer kavzo, el pezava kada una de sus palavras afin de eliminar el mas chiko risko de ekivoko.

Su ija la “Dochente Dr. Ethel Gidon”eya tambyen ensenyante en la Fakultad de Matematika, le avia un dia demandado (al empesijo de su karrera) komo responder a un estudyante ke formula una kestyon a la kuala eya no tyene kualkyer repuesta. Su padre le disho: - “Lo ke vas a responder? Nunka kozas de laskualas no sos segura, ma simplemente la verdad “ke no saves i ke vas a bushkar la repuesta para komunikarsela”.

Selim Kaneti era esto, un Ombre de profunda refleksyon, un Ombre de verdad i de klaredad.


Klara PERAHYA