gozlemkitap
RSS
Yayın Haftaları X
Muevo sujeto de litijyo en una “akuzasyon de nepotizmo” formulada kontra Dominique Strauss Kahn*

A las preokupasyone kotidyanas de la prensa Amerikana i Evropea konsernando la dezastroza situasyon ekonomika aktual i la eleksyon del muevo Prezidente de los Estados Unidos, se adjunto un treser sujeto: “la akuzasyon kontra el aktual Prezidente del Fundo Monetaryo Internasyonal, Dominique Strauss Kahn”, akuzasyon ke pretende kel shefe del I.M.F. no solo kometyo un akto de adulteryo en el seno mizmo de esta importante Institusyon, ma tambyen “favorizo en su adelantamyento la kolega kon la kuala el tuvo relasyones ekstra konjugales”.

Este de alkavo punto es ekivalente a un “ abuzo de konfiansa” i es konsiderado komo una de las mas grandes kulpas ke se puede azer en un Establesimyento ofisyal de esta dimensyon.

Todo en admetyendo aver echo un akto pasajero de adulteryo por el kual el se ekskuzo avyertamente serka de su mujer i de sus kolegas, Dominique Strauss Kahn desmentyo por kontra, kategorikamente, aver perpetrado un kualkyer akto de nepotizmo (favoritizmo prohibido por la moral, en ke kampo de aktividad ke sea).

En efekto, el es konsiderado mundyalmente, mizmo de la parte de sus propyos antagonistos, komo un ombre muy sezudo, de perfekta moralidad i de absoluta integridad en sus djuzgamyentos i sus echas.  

Munchas bozes amigas en Fransya komo al seno mizmo del Fundo Monetaryo Internasyonal, protestaron vigorozamente kontra esta akuzasyon ke fue konsiderada komo una kalomnia, en un momento de grande difikultad mundyal ande djustamente el sehel i el humanizmo de Dominique Straus Kahn son absolutamente nesesaryos.

Es un fakto ke, responsavle de una djusta djestyon del patrimonyo monetaryo mundyal i prinsipalmente del ayudo finansyero rezervado al adelantamyento de los puevlos en estado de progresyon, el aviya pensado, desde los primeros dias de la kriza ekonomika aktual, a las konsekuensas muy graves ke eya puedra tener sovre los payizes emerjentes en sus esforsos de desvelopamyento.

Ainda tres semanas antes, el avia deklarado lo sigyente:

“La totalidad del mundo es aktualmente globalizada i las konsekuensas se azeran sentir en kada lugar....En algunos de estos payizes una disminusyon del kresimyento (desvelopamyento) puedra tener konsekuensas umanas  dramatikas: desnutrisyon de los ninyos, ambrera, pujita de la mizerya, abandono de los proyektos edukativos, ekonomikos i sosyales.  

El Fundo Monetaryo Internasyonal esta konsyente ke los presyos de numerozos produktos alimentaryos seran muncho mas altos ke lo ke eran antes de la kriza. 50 payizes ke tyenen un revenido flako se topan en este momento en estado de grande reziko, entre eyos munchos payizes de Afrika i de la Amerika Latina...“

Interojado sovre el aktual objetivo dominante del IMF (el kual, ay de esto unos kuantos anyos, tenia komo  prinsipal misyon de asegurar una regulasyon ekonomika impermeable a kualkyer problema sosyal) Strauss-Kahn respondyo: “Oy la misyon del IMF es de render servisyo, esto es la sola politika efikas”.

En medyo de la kriza finansyarya ke afekta direktamente o indirektamente la grande mayoria de los payizes rikos komo proves, un semejante sospecho de nepotizmo, sovre baza de simples supozisyones kontra un ombre de desizyon de una tala valor, parese ser sorprendente i sovre todo inoportuno.

Kualo puede ser el motivo real de esta akuzasyon? Selo? Rankor? Kodisya? O puede ser (no lo kero kreer) otra koza?

El Fundo Monetaryo Internasyonal anunsyo ke una enkuesta sera avyerta en el buto de determinar si Dominique Strauss Kahn es “Si o No” realmente kulpavle de abuzo de poder en favor de una persona kerida.

Se aspera en los dias vinyentes el rezultado de estas investigasyones .

De su parte, en repuesta a las rumores malkerensyozas ke lo akuzan, Dominique Strauss Kahn anunsyo ke el kargo su avokato de persigir judisyalmente los ke espandyeron estos ruidos falsos a su sujeto.

 

*Dominique Strauss Kahn:

Aktual Prezidente del “I.M.F”

Ombre de estado Fransez

Orijinaryo de una famiya

Djudia Yiddish/Sefarad

Facebook'ta Paylaş
Yazar Klara PERAHYA
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008