gozlemkitap
RSS
Yayın Haftaları X
Gilles Bernheim Gran’Rabbino de Fransya
Gilles Bernheim Gran’Rabbino de Fransya

Un grande intelektual se topa a la kavesa de la komunidad Judia de Fransya kompuesta de 600/700.000 myembros, rika en su kompozisyon kon la diversidad de sus komponentes, los unos de orijen Alzasyano, los otros venidos de la Afrika del Norte, todos imprenyados de un grande respekto i sovre todo de un grande amor por sus patria, sin por esto renyegar sus apartenensya a la fey mozaika...

Diferentes los unos de los otros en sus uzos i kostumbres, sus manera de aserkarsen de algunos problemas, sus persepsyon de la vida de kada dia o sus modo de ekspresarsen, eyos son syempre atados a la baza (lo ke es el kavzo por todas las komunidades judias de la diaspora) por un mizmo amor inkondisyonal enverso el Estado Israelyano.

Aprovechandosen de la libertad de ekspresyon akordada por la Fransya a todos sus sitizanos (a la sola kondisyon de nunka kayer en la mentira o la kalomnia), muestros korelijyonaryos no mankan nunka de dar sus opinyones i formular sus protestasyones (algunas vezes prematuramente) kuando les parese persivir la mas chika irregularidad o injustisya.

A este efekto, el muevo Gran’Rabbino afirma toda su konfiensa en la Justisya Franseza. Ansi kuando le demandaron lo ke pensava sovre el drama del manseviko Judyo agresado (ay de esto unas kuantas semanas) porke yevava una kippa, su sola repuesta fue ke el kavzo topandose ainda en periodo de investigasyon, el rezultado apartyene a las altas instansyas juridikas del payis las kualas aklararan la koza kon objektividad i ekidad.

Esto mos da una chika idea de la maturidad de su manera de pensar .Sus serkanos mos dizen ke “Ombre de refleksyon i en mizmo tyempo de aksyon” Gilles Bernheim mos ensenya ke la realidad es muy kompleksa, lo ke lo pusha a egzijir de sus kontemporeanos un grande esprito de responsabilidad i ser avyertos i prontos a dialogar..

Su propya vida fue syempre dedikada al estudyo i al servisyo de su komunidad. Despues de aver kumplido sus estudyos de filozofia al nivel el mas alto, Gilles Bernheim fue nominado Rabbi de los estudyantes, poko mas tadre de los universitaryos i enfin Rabbi i Gran’Rabbi de la byen konosida Sinagoga de la Viktorya.

Antes de todo el kere ser el Rabbino de los rabbinos i el guia moral de la komunidad., pushar a pensar i a bushkar la egzaktitud en todo, prinsipalmente en las palavras utilizadas para ekspresarmos.

Su ortodoksia es estrikta, iguala a la ortodoksia de su predesesor Rav Sitruk, ma tambyen el es ombre de Avyertura i de Dialogo.

Su estilo de dirijir la komunidad sera moderno, transparente i aksesivle a la komprensyon de todos.

Su programa tendra komo eskopo de renforsar los pilares de la vida djudia ke son “el Rabbinato”, “la edukasyon” i “la kasherut”...

Su objetivo de baza: “Reunir los djudyos en la solidaridad, bushkar el dialogo i el konsensus .

Tambyen kon la mizma “ Voluntad de Avyertura” bushkar el dialogo inter- relijyozo todo en guadrando intakta su propya ortodoksia i en respektando la de los otros sin nunka prozelitizmo..

En su livro entitolado “Un rabbin dans la cite” (Un Rabbi en la Sivdad), el kere mostrar ke se puede ser un Rabbino ortodokso sin por esto ser kortado de la vida laika.

Vice Prezidente de la Asosyasyon Judeo-Kristyana de Fransya, Gilles Bernheim publiko un ovraje relatando las entrevistas ke el tuvo kon un Kardinal, lavoro ke prova de una parte los progresos echos en el dialogo Judeo-kristyano i de la otra vanda las grandes diverjensyas ke se topan entre las dos relijiyones.

Su eskopo sera syempre de “recojer” i “reunir” su komunidad..

Me topo en el ovligo moral de kortar este artikolo en dos ,visto ke el espasyo ke mos es akordado en esta pajina es limitado La semana vinyente mos propozamos de publikar unos kuantos paragrafos de la entrevista ke un djornalisto de la revista franseza ”Informasyon Juive” avia echo kon Gilles Berheim en el mez de djunyo, durante la epoka pre- elektoral.

Ansi kada lektor puedra egzaktamente tener una idea klara de la kualidad de refleksyon i de la noblesa de pensamyento del ke fue eskojido Gran’Rabbino de la mas grande komunidad de Evropa..

Facebook'ta Paylaş
Yazar Klara PERAHYA
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008