gozlemkitap
RSS
Yayın Haftaları X
‘Mach Turkia / Almanya, paradokso de una derrota’
‘Mach Turkia / Almanya, paradokso de una derrota’

‘El rikinyon Bill Gates demisyono de la vida komersyal aktiva’

Todo komo los tres  kavzos de los kualos vos avli la semana pasada, ay envezes (en kampos de aksyon enteramente diferentes) akontesimyentos  ke paresen a primera vista sin  nigun raporto  vizivle entre eyos, ma ke provokan  en mozotros la mezma manera de pensar

Por la mas parte, se trata de evenementos (paradoksales en eyos mizmos) ke mos pushan a formular, de mozotros para mozotros, syertas  kestyones.

En realidad, ay un plazer a avlar kon si mizmo, esto mos ovliga munchas vezes a bushkar  repuestas i tresboka ansi syertas valores establesidas...

Myerkoles  el 25 del mez pasado. Derrota (yenilge) de la ekipa turka de footbal... Las razones eran multiples i komprensibles. Entre otras: “djugadores importantes mankos a la sigida de feridas resividas en el mach presedente de vyernes la noche”, “ekipa adversarya muy fuerte” etc...etc... Lo mas sorprendente es ke malgrado el rezultado negativo, la prensa estranjera  no kedo de formular sus apresyasyones sovre la stratejia perfekta del djugo i la kondukta impekavle de los djugadores Turkos, asta deshar un poko  en la solombra el trıumfo de la ekipa viktoryoza.

Nunka  tyene avido en las gazetas Fransezas i İnglezas, semejante kuantidad de elojyos en favor de una  otra ekipa vensida, asta darmos la impresyon ke  esta desfecha era  no un evento negativo ma una konfirmasyon de la importansa primordyal de syertos prinsipyos morales de baza.

Vyernes la tadre, el 27 del mizmo mez: Bill Gates (tresera grande fortuna del mundo)  aedado solo de 55 anyos,  anunsyo publikamente  ke se retira  de la vida komersyal aktiva para pueder konsakrarse enterament (en kolavorasyon kon su mujer) a la direksyon de su fundasyon de 37,3 milyardas de dolares, kreada para eradikar (kökünden sökmek) la mizerya  en los payizes del tyerso mundo.

En muestro siglo de pragmatizmo,demisyonar de un echo kolosal en kontinual ekspansyon, a la edad la mas fruktuoza de la vida ande la vivachidad de esprito se topa a su punto kulminante, lado kon lado kon la maturidad, para dedikarse enteramente a una ovra filantropika de esta importansa, es no solo un akto korajozo de abnegasyon, ma la afirmasyon mizma de una konsensya ajisante.

Es verdad  ke el no tyene menester de lavorar para bivir en el mas grande lukso, ma en todo kavzo el esta  renunsyando  a  la borachez de esta voluntad de potensya  ke es  el propyo del ombre en su kampo de aktividad.

Su mujer tyene el uzo de dezir “pensamos ke los ke resiven lo mas, deven a sus torno ayudar lo mas”.

La azyenda de Bill Gates i  su mujer es de 58 milyardas, montante del kual los 37,3 milyardas fueron dedikados a la kreasyon de la dicha “fundasyon Bill i Melinda Gates”. Asta oy, eyos ya dyeron 16,5 milyardas en favor de la lucha kontra la provedad, la eradikasyon de la Malarya i del Sida, la edukasyon i instruksyon eskolarya de ninyos, el desvelopamyento de los espasyos rurales en los payizes ande ombres, mujeres i kreaturas biven en la mizerya absoluta, la distribusyon de mikro kreditos afin ke kada uno tenga la posibilidad de lavorar i salir ansi del marazmo ekonomiko ande se topa undido.

Pragmatiko, Bill Gates pensa ke munchos problemas ke provyenen de la provedad puedran ser rezolvidos grasyas a un ayudo fuerte a la baza. La sola koza ke el aspera en retorno, es “rezultados konkretos” i “realizasyon minusyoza de los planos trasados”.

Programa muy riko en posibilidades i esperansa, a la kondisyon ke la otra parte  responda de una manera pozitiva i aga el esforso menesterozo para salir de su estado lamentavle, lo ke no es syempre muy fasil.   

Facebook'ta Paylaş
Yazar Klara PERAHYA
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008