gozlemkitap
RSS
Yayın Haftaları X
Enkontros Kalorozos
Enkontros Kalorozos

A Myriam Cuneo la enkontrimos primera vez, antes un anyo en la pajina de Esti Saul. En la rubrika “Amaneser kon Arte”, Myriam, ansi se prezento eya propio: “Un abraso grande de esta Turkita de Uruguay...” Poko despues, en el No. 35 de “El Amaneser p.9, estamos meldando el nombre de Myriam komo eskrivana, en un teksto biografiko, ampesando ansi: “Agora esto meldando la istorya de Hernan Rodriguez Fisse, de Chile. Me dio la idea de kontarvos mis anyos de chikes i estudyos...”

Mi konosensya de Miriam no se limito kon estos dos tekstos. Despues de aver meldado un artikolo miyo, eya me mando una letra personal dizyendo en rezume: “Preciada Coya, avlas de muestra lingua muy hermosa... Yo nasi en Uruguay, kon dos abuelas Turkas Sefaradis... Me izites akodrar... Si el D. lo kere, mos veremos en Estambol, i hablaremos de estas maraviyas de muestras famiyas... Te felisito por kerer ke muestra lingua siga viva, ma kreigo ke es difisil de lograr (başarmak) ke lo hablen las djenerasyones nuevas...” A la verdad keridos lektores, akel diya en meldando la letra, no aviya entendido lo ke keriya dezir en mensyonando “mos veremos en Estambol”... Me paresyo un sueto. Agora ya se de kualo se tratava...

Una ermoza koensidensya, (raslantı) en el mizmo No. 35 de muestra revista, en la pajina de arte, estamos konosyendo otro nombre: Becky Franco, ke le esta dizyendo a Esti Saul: “ Esto muy eksitada ke va ser prezentada en “El Amaneser”. Gracias por konsiderarme...” Becky es nasida en Cuba, de raizes de Estambol, i bivyendo aktualmente en New-York. Dunke, Myriam i Becky tyenen dos puntos komun: son Sefaradiyas kon raizes de Turkiya, i todas la dos son artistas pintadoras. El fakto de ser nombradas en la oja de Esti, bastava para afirmar ke tyenen relasyon kon el Arte.

Ma, aki se limita la asemejansa de estas dos muchachas Djudias. Son difrerentes la una de la otra, komo el diya i la noche, komo el Norte i el Sud. Becky es de una egzuberensya kaji kontajyoza myentres ke Myriam es kalma, mas retirada. Esto es la impresyon ke me desharon. İ eyas ya achetaron ke no se paresen de dinguna manera seya fizika, seya moral, afilu en la manera de pintar i konsever la vida. Kada una, para mi tyene su propia valor i importansa, puede ser mizmo, achakes de esta diversidad...

Asigun se entyende, tuve la semana pasada la oportunidad de konoserlas de serka, de abrasar i bezarmos. Tambyen kon los miembros del sitio de İnternet ladinokomunita ke vinyeron a Turkiya, konoser las tyerras ande bivyeron sus avuelos. Alhad 8 de Junio, tuvimos un emosyonante enkontro kon los ke vinyeron de todas las partes del mundo: Estados Unidos, Brazil, Uruguay, Espanya, Australiya, Israel, i naturalmente Turkiya... Ansi konosi de serka a, estos nombres ke meldava a traverso los mesajes del sitio.

Me izo un plazer imenso de toparme kon Rachel Bortnick, fondadera del sitio ladinokomunita. Kon Rachel mos konosimos en el 2003, myentres su viaje a Estambol. Syempre sigio mis esforsos en Judeo-Espanyol. Se korresponden kon mi ijo de vez en kuando, i no manka de adjustar unos dos byervos para mi.

Myerkoles 11 Junio, el grupo vijito el “Şalom”, ke no se si fue testigo mas antes a tantas konversasyones meskladas kon inglez, turko, ebreo i diversos dialektos de espanyol. A un momento ampesimos a avlar Judeo-Espanyol, en fin de kuento, el dezeo unanimo del grupo...

Facebook'ta Paylaş
Yazar Coya DELEVİ
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008