gozlemkitap
RSS
Yayın Haftaları X
Reminisensya
Ay de esto 60 anyos, el "Şalom" fue fundado por Avram LeonAy de esto 60 anyos, grasyas a un Ombre de inisyativa, fuerte i korajozo, kritiko a sus oraz syempre afin de obtener rezultados pozitivos, fue kreado el semanaryo Şalom.
Klara PERAHYA

La semana pasada, en metyendo un poko de orden en mi biblioteka, me paso por la mano un livro ke un vyejo amigo “Benjamin Akshiote” avia eskrito i mos avia mandado... I  en supito, kinze o vente anyos despues de su muerte, senti el menester de  avlar de el, de pronunsyar su nombre, de verlo eskrito sovre la pajina ainda blanka ke se topa delantre mi.
Tenemos todos la posibilidad, mizmo si es por un minuto, de azer rebivir una persona  en muestra memorya, muestros rekuerdos, muestro karinyo.
No se si uno de entre los ke meldaran estas kuantas lineas se akodran ainda de el... ermano grande de los Doktores Viktor i Moise Akshiote, el okupava el posto de Kanchelaryo en la embashada de Kina de la epoka... Ombre de  una ekstraordinarya kultura i de una  profunda refleksyon, el paso los tres kuartos de su vida en Ankara, entornado de su mujer i de sus dos ijos, un poko ahuera de la Komunidad Djudia .
El era antes de todo un esprito universalisto ke savia trespasar kon fasilidad las fronteras trasadas  entre diferentes  epokas, komo tambyen entre diferentes konsepsyones... Nada lo deshava indiferente, todo lo interesava...
El mos avlava kon el mizmo entusyazmo de una katedral de la epoka medyeval ke avia vijitado a la okazyon de un viaje en Evropa , komo tambyen de la arkitektura de una”Djami” fraguada durante el renyado de un Sultan Otomano... de una pintura  de Velasquez, komo tambyen de la ovra la mas abstrakta  de Picasso, Kadinsky o Miro...
Aunke muy selektivo i mizmo muy kritiko en sus analizes, el savia deskuvrir  lo mijor en kada koza, el senso eskondido de un detalyo, la sinyifikasyon difisilmente perseptivle de un poema....
Kuando Benjamin Akshiote venia por dos o tres semanas a Istambol, teniamos  kaji syempre kon el, endjuntos kon otros amigos ,largas konversasyones ke turavan asta las tres de demanyana... Momentos inolvidables ke mos markaron fuertemente...
En realidad de kualo semos echos? Por seguro de un kualkyer patrimonyo hereditaryo, ma tambyen de todo lo ke vemos, meldamos o oyemos, de todo lo ke mos dan las personas ke tenemos la oportunidad de frekuentar.  Una chika observasyon, o una refleksyon  formulada delantre de mozotros, mizmo en pasando, sin objetivo presizo, puede pusharmos a tomar konsensya de  kozas  ke probablement no ivamos mizmo remarkar..
Los septikos afirman ke todo ya fue dicho i ke  no ay mas nada a adjuntar... no se si tyenen razon. No kale olvidar ke kada mueva diskusyon sovre un  kualkyer sujeto, sin prejuisyo negativo ni obstinasyon, es paridera de muevas ideas..
Es verdad ke de Socrates asta Sartre, kaji todos los grandes preseptos ya fueron enunsyados komo prinsipyos permanentes i infayivles... ma la epoka, el konteksto historiko-sosyal i sovre todo la atmosfera  ande eyos fueron formulados, eran diferentes.  
Todo troka, salvo la valor inkalkulavle de la amistad...

 

Facebook'ta Paylaş
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008