gozlemkitap
RSS
Yayın Haftaları X
El 10 del Marso: El diya de la komemorasyon de los 50.000 Djudyos salvados de las manos de loz Nazis
El 10 del Marso: El diya de la komemorasyon de los 50.000 Djudyos salvados de las manos de loz Nazis
Dora NİYEGO(rezultado de una bushkida)Los Bugaros komemoraron el 64`ien aniversario de la salvasyon de la populasyon djudiya de Bulgaria, de las manos de los Nazis. Los Bulgaros pozaron rozas delantre del monumento memorial en Santo Sofia Katedral, por onorar los ke salvaron los djudyos en el Holokosto.
El Parlamenterio Prinsipal, Pirinski, desho rozas en un lugar serka de la Asamblea Nasyonal en Sofia, por komemorar la valor de los Parlamenterios ke protejaron los djudyos durante la Segunda Gerra Mondial.
Mezmo ke los Bulgaros estavan en la mezna parte kon los Almanos durante la Segunda Gerra Mondial, eyos refuzaron de akseptar el orden de los Nazis de deportar sus 50 000 djudyos a los kampos de la muerte.
Los efuersos del Governo i de la Eglisia Ortodoksa i espesialamente los efuersos del Rey Boris el treser, reusheron a salvar los 50 000 djudyos bulgaros. La desizion final del governo para refuzar la demanda de los Nazis fue tomada en el 10 del Marso del anyo 1943. El Governo de Bulgaria de oy, desido de komemorar kada anyo el 10 del Marso, komo diya de las viktimas del Holokosto.
La  organizasyon djudiya en Bulgaria, Shalom, i tambien la asosiasion para la koloborasion entre Bulgaria i Israel organizaron seremonias en Sofia en este diya.
El eskridor del livro ‘A True Story Never Told’ (Una historya verdadera nunka kontada), Micheal Bar Zohar, nasyo en la kapitala Bulgara, Sofia, en el anyo 1938. Duspues de la Segunda Gerra Mondial, kuando el teniya diez anyos, su famiya emigro a Yaffa, Israel. El izo su servisio militerio en la Fuersa Aerea i eskrivyo la biografiya de Ben Gurion.
En el anyo 1993, kuando el estava lavorando komo Profesor en la Universitad de Emory en New York, un diya, Zohar meldo en el periodiko New York Times, un artikolo sovre la salvasyon de los 7200 djudyos en Dinamarka. Presto, se desido de eskrivir al periodiko sovre una salvasyon mas grande: la salvasyon de los djudyos de Bulgaria. Este artikolo tuvo tanto sukseso ke sus kolegos en la universitad lo konvensieron a eskrivir el livro ‘A True Story Never Told’ (Una historia verdadera nunka kontada).
Munchos djudyos saven la historia de los djudyos de Dinamarka ke fueron salvados pasando la Suesia en barkas de peshkadores, ma muy pokos saviyan la historia de los djudyos bulgaros. Duspues ke este livro fue eskrito, mas munchos djudyos se ambezaron esta historia. Dingun djudyo bulgaro no fue deportado a los kampos de la muerte.
En el anyo 1999, Abraham Foxman, el direktor de la Liga de la Antidefamasyon (ADL), se fue a Sofia kon una delegasyon por toparse kon el Primero Ministro Bulgaro i le izo regalo el livro ‘Beyond Hitler’s Grasp (Mas leshos de la alkansa de Hitler),  un otro livro eskrito por Micheal Ben Zohar, en el anyo 1998. Este livro dokumenta los eforsos de los Bulgaros para salvar los djuduyos. Foxman izo 30 000 kopias de este livro i los embiyo a la Bulgaria porke los Bulgaros poedan partisipar a la alegriya, en ambezandosen este akto heroiko de sus hisyoria.
Esta historia es el grande ultimo sekreto pasado en el tiempo del Holokosto. Esta historia fue enterrada por los Komunistos Bulgaros asta la fin del Komunizmo en Bulgaria, fin al anyo 1991. Todos los rekuerdos fueron guadrados por los Komunistos Bulgaros porke eyos no kijeron glorifikar al Rey, a la Eglisia i a los Parlamenterios non-komunistos. Los 45 000 djudyos de los 50 000 salvados ya aviyan emigrado a Israel duspues de la gerra i por esto este sujeto fue serrado.
Bulgaria es un pais chiko, i al empesijo de la gerra teniya una populasyon de 8 milyones. En la Segunda Gerra Mondial, los Bulgaros estavan de la parte de los Almanes porke keriyan tomar atras la Makedonya de las manos de Yogoslavia i la Trakya de las manos de la Gresia. Estas dos provansas fueron tomadas de los Bulgaros en la Primera Gerra Mondial.
En el anyo 1942, los djudyos de Selonika fueron embiyados a la muerte, pasando de la Bulgaria en yindo a los kampos de la muerte, en vagones yenos de djente. Las nuvelas de esta inhuminidad era el sujeto de konversasyon en la Bulgaria akeyos diyas. En el anyo 1943, el Governo Bulgaro fue enformado por los Nazis, ke deshen a los djudyos Bulgaros porke seygan deportados a los kampos de la muerte, en el mez de Marso. Los djudyos bulgaros fueron forsados a atarsen estreyas amariyas a los brasos.
Kuando la data de deportasyon se aserko, la ajitasyon de los Bulgaros empeso a pujar. Kuarenta i tres myembros del partido primer del Parliamento kaminaron en las kayes, por protestar este akto kruelo. Las gazetas eskrivyeron la inhminidad de este komporto. El Patriarko de la Eglisia Ortodoksa Bulgara, se echo embasho enriva los rayes del treno por protestar este akto.Finalmente, el Rey Boris el treser, se desido de refuzar la deportasyon de los djudyos. Mezmo ke eran de la mezma parte, los Bulgaros fueron ovligados a gerreyar kon los Nazis por solvar esta problema.
Duspues ke analizi este sujeto, yo komo Dora Niyego, kiti dos konkluzyones de este evenemiento. La primera es ke si keriyan, i la djente de los otros paises se puediyan opozarsen a los Almanes por salvar a los djudyos de sus paises. La segunda konkluzyon es ke no aviya diskriminasyon en la Bulgaria en akeyos diyas. Los djudyos bulgaros no eran relijiozos i eran mas muncho entegrados kon los otros bulgaros, kuando komparados kon los djudyos de los otros paises. En Bulgaria, en akeyos diyas, aviya munchas minoridades: los Ermenis, los Turkos i los Zinganos. No egzistiya dingun rasizmo en la kultura bulgara.  Los Bulgaros viyan a los djudyos komo Bulgaros i no komo djudyos. Siendo un pais chiko komo Dinamarka, todos los myembros de la komunidad eran atados unos kon otros, la koza ke no egziste en los paises mas grandes.
Esto es un egzamplo ke devemos de tomar: la entegrasyon de todos los puevlos en una komunidad los aze atados imas fuerte kontra sus enemigos.
El mas selebre de estos 50 000 djudyos bulgaros ke fueron salvados del Holokosto era un mansevo ke, apenas aviya eskapado la Akademiya Militeria en Bulgaria. Kuando este mansevo emigro a Israel, troko su nombre i tomo el nombre MOSHE DAYAN.
Facebook'ta Paylaş
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008