gozlemkitap
RSS
Yayın Haftaları X
Tornando otruna vez a los Anyos de Chikez -2
Tornando otruna vez a los Anyos de Chikez -2

Kontinuando…

En kada semana era komo un ritual para mi, una fyesta ir al sinema. Vestir el vestido de Shabat, penyarme, tomar la mano del papa… En el kamino una estasyon fiksa: el Borekchi de Tunel. Borek kon asukar pudra! El mas savroso ke komi asta oy en diya.A la buelta, otra estasyon. Serka la Kula merkavamos salata vedre para akompanyar las pirzolas i “keftes” ke preparava mi mama. Komo asperava yo estos diyas de Alhad!!.

Yüksek Kaldırım… el departemento de mi Onkl İzak i mi Papu Moshe. Mi enkontro kon el  ampesava kon bezarle la mano, resivir la “beraha” i despues lo mas enteresante! para mi. Mi Nono metiya la mano a la aldikera i me dava unas, dos paras. De eyas no me ize riko ma puede ser ke las bendisyones me ayudaron en la vida. Mi Onkl İzak… es kontar anekdotas, syempre  sonriente, un espirito de buendad ke mantuvo toda su vida. Los dos eran de estas personas raras, syen por syen “korason”. En Gan Eden ke repozen Amen. 

A la syedra, abashando Yüksek Kaldırım, en Yazıcı Sokak (Se troko el nombre) fuimos a l’Alliance ande estudyi 4,5 anyos. La eskola del Sr. Bicerano (İkindji Karma). La yamavamos La Liyansa. Oy, un edifisyo de bienfezensya ke abriga menesterozos de muestra Komunidad. Achakes de mi Aliya, por unos kuantos mezes fui un “Hero” en la klasa. Afilu el profesor de disiplin, Mr. Kohen (ke teniya syempre un paliko en la mano), se izo mas blando aun ke ize kozas ke meresiyan “djeza”. Agora ande estariyan los elevos de mi klasa?  Me akodro tambien de Mr.Nisim Behar ke mos ambezo el Ebreo.

Mis ijos tyenen difikulta a entender komo no me fui a una mestra, (ana okulu) un “Gan”, komo dizimos aki en Israel. Me demandavan “Aba, ke izites en kaza asta irte a la eskola?.. Ni mi ermana, ni ermano no se fueron al Gan. Yo era mas mazalozo porke teniya en kaza una profesora partikolarya (özel öğretmen). Mi ermana me ambezo a meldar, eskrivir i afilu a desinar. Ansi ampesi a la primera klasa sin dingun problem. Mi ermana es 12 anyos mas grande ke mi. En el final de los anyos 40 eya estava para eskapar el kolejyo fransez. Aun kon todo se okupo muncho de mi.

Para mi la Kula, kon las kalejas al derredor, era una meskla de kolores, golores i savores. Entre el otel “Boutique” muevo i el “Neve Shalom” bushki pipinos de trushi ke se vendiyan en una kupa kon sus agua de sal…En el “Kafiko de la Kula” el gazoz de mi padre ke le agradava kon un poko de asukar para ke fermante… El kasap, la farmasiya de Mr. Albert... Todos avlavan en Ladino. Me enkatava de todo lo ke aviya en el rededor, seya las karnes enkolgadas en el kasap o otras kozas… 

En bushkidad de mi chikez, arivamos a Saffet Bey Apt, ande me engrandesi. En el treser kat, la ventana del salon me akodra el “chuflete” de mi Papa tornando kon paketos. Chuflava, mi Mama echava el sesto  el paketo se mete aryento i hop! Se trava el sesto. Kedo chuflete  de la famiya asta oy en diya. En mi chikez biviyan ayi 16 famiyas djudiyas.

Los padres saliyan a sus echos i las madres  damas de kaza, syempre okupadas kon el “nido” (ev, yuva). En vezes topavan tyempo entre los echos para avlar en el portal. Mme. Amada me akodro me yamava “David Meleh Israel”. Fue la primera a tomar telefon. Mos ivamos  a ver esta “maraviya”. El sigundo grande paso de teknolojiya fue el “frijider” primero del apartamento, el muestro. Muy presto se yeno kon las kozas de las  vizinas porke mi Mama no saviya dizir “no”! İ en el primer etaj morava Mr. Avram Leyon,  fundador del jurnal “Şalom”.

En akeya demanyana de Julio, les konti a mis ijos estos rekuerdos. 50 anyos kondensados (rezumados) en un tur de 3-4 oras. Para mi, eskrivir de muevo estas linyas, fue komo tornar otruna vez  al “Ladino” de mi chikez.

Dr David Azikri

A la atansyon del lektor! Pensi ke es un dover etik miyo de arranjar el yerro ke se izo la semana pasada en esta pajina. El artikolo “TORNANDO otruna vez a los Anyos de mi CHİKEZ”, de dinguna manera no es miyo. Es mandado por el Dr. David Azikri de Hertzliya. Todas muestras eskuzas por este error. Rengrasyo el Sr.Azikri por el kudyo ke tuvo de embiyarmos su eskrita i sueto a el i su famiya una Fyesta de Purim alegre.

Coya Delevi

Facebook'ta Paylaş
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008