gozlemkitap
RSS
Yayın Haftaları X
Mirar, ver i no saludar

Somos una komunitad de 20.000 personas en Estambol. Todos somos kaji komo una famiya, mos konosemos, estamos endjuntos en todo modo de evenementos orozos i malorozos, komo “tefillines”, “brit-millas”, “bodas”, “funerales”, okazyones de las organizasyones djudiyas, aktos kulturales komo teatros, i munchas otras kozas.

La teknolojiya trusho munchas fasilitades, komo el e-mail, sms, skype; porke las personas se estan kansando de bushkar por egezempyo kon telefon!...

Malorosamente , las personas de edad mas ariva de 50 anyos; keremos sintir la boz, sentir (hissetmek) el reflo (nefes), la kayentor del den frente.

Kuando se bushka kon telefono; se demanda komo esta el den frente, los membros de su famiya, la sanedad i munchos otros sujetos se topa para avlar.

Ma; kon el “e-mail” i “SMS”’es se transmete (aktarmak)  las novelas solamente kon tres byervos; i si es una novela negra por egzempyo de un funeral ke no estas asperando, mos esta azyendo pena, sin pueder avlar!...

Komo de tyempo ke vinimos!...

Es verdad ke la teknolojiya trusho munchas fasilitades, ma yevo i munchas otras komo la sensibilitad, el respekto de eskrivir...

Mizmo saludar al den frente esta difisil para unos ke no tyenen la uzansa ni de dar una sonrisa (tebessüm), ni de meneyar la kavesa, u avlar kon los ojos, u el puerpo, ni mirar las karas. No es emportante avlar dos palavras, ma no saludar es una kualitad de los “Estambullis”!..

Ke manera de komporto es esto!...

El den frente kale ke tenga una personalitad, u un lugar emportante en muestra komunitad para pueder azer una konversasyon i diskutir.

Esta mizma persona ke no te ve en una kamareta de 40 metros; un diya puede vinir a demandar a tu kaza lo ke tyene menester.

Todos tenemos problemas diferentes en muestras kazas. Ma la Kerensya es un konsepto ke te da la fuersa de kontinuar a bivir kon todas las difikultades de la vida.

Saludar es “salud” i “pas” (shalom).

Antes 100 anyos, kuando se saludavan se diziyan “shalom”; ke kere dizir “pas” en todo modo de punto de vista.

Yo penso ke; malorosamente la kerensya se aminguo, i todo modo de amigable kresyo enriva del materyalizmo. Lo ke mos kaye de azer es; de enalteser la kerensya entre todos, i azer todo modo de buendades al den frente; para ke la jenerasyon vinidera toma  este egzempyo.

Entremientes shabat la noche estuvimos en la Bar-Mitsva de Mark; ijo de Lidya i Nedim Kohen i inyeto de Sevim i Mois Kohen.

Fue una nochada fabulosa (muhteşem), kon muncha djente, las mujeres kon fostanes largos, los ombres kon kostumes i papiyones, la organizasyon de la nochada byen preparada, todo blanko; las rozas, los manteles, las mezas, di ke paresiya una boda.

Aviya una enerjiya positiva entre los envitados.

La kontentes de todos se estava vyendo de las karas. 

Mark estava un prens novle (asil), la persona la mas emportante de la nochada.

La organizasyon del show, de los bayles de la famiya entera estava koza de ver.

La kerensya, la ermandad i la fraternitad son las kualitades ke azen kreser la positivitad i el byen kerer entre los umanos. Ser buenos i no pensar kozas negras no abasta solamente, lo emportante es; de ayudar al den frente i enalteser el nivel de la vida en azyendo ovras.

Ay una palavra ke dize : “Las ovras son kerensyas”.

“Lo ke azes, topas!”...

Sevim i Mois Kohen son personas muy kayentes, kerensyozos i amados por todos.

Le sueto a Mark; shans buena en la vida, sanedad, reushitad, i veluntad entornado de la kerensya de su famiya.

Facebook'ta Paylaş
Yazar Şeli GAON
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008