gozlemkitap
RSS
Yayın Haftaları X
Trajedia en las mares del Oriente Medyo
Trajedia en las mares del Oriente Medyo

El mundo entero, kaji en su totalidad, esta aktualmente en un estado de terrivle konsternasyon i  revolta enverso la falta  (djustamente o falsamente) atribuida a la armada Israelyana  en su abordaje de una flotiya internasyonal de embarkasyones yenas de partizanos Palestinyanos de divers payizes, flotiya destinada a yevar a la populasyon de Gaza un apoyo moral de la parte de sus amigos militantes, ansi ke produktos de  primera nesesidad.

Mas de 15 personas pedreron la vida en la konfrontasyon entre los soldados Israelyanos i los okupantes de las naves de varias nasyonalidades, i mos adjuntamos a todos los ke de serka komo de leshos sufren en sus propyas karnes la pedrita de un “kerido” en este drama.

Komo es la kostumbre, la responsabilidad  de esta desgrasya fue otomatikamente atribuida  ekskluzivamente a la armada Israelyana, lo ke ainda no se puede ni afirmar ni desmentir kategorikamente..

Entre varias otras informasyones, el kotidyano Fransez “le Figaro” mos dize ke segun el governo Israelyano: son los myembros de la flotiya ke empesaron las violensas.

Mark Regev portaboz del governo de Natanyahu,  todo en regretando amargamente la pedrita de vidas humanas, deklaro fuertemente lo sigido: “Malorozamente muestros soldados fueron atakados kon una ekstrema violensa por los ke se topavan en las embarkasyones, kon varras de fyerro, kuchiyos i golpes de balas verdaderas. Ansi topandosen ovligados de defender sus vida, eyos  utilizaron malorozamente medyos fuertes i avyeron huego.”

Enkuestas seryozas (lo esperamos de todo korason) seran echas ke van aklarar la situasyon de una manera imparsyal i objetiva.

En  este moment, el sentimyento dominante es la estupefaksyon, el regreto profundo i la dezolasyon de ambezarmos ke mansevos muryeron, deshando detras de eyos ken una madra undida en su dolor, ken una mujer i puedeser ninyos desmamparados en sus dezespero.

De ke orijen ke sea, kada muerte de mansevo, kada vida interrumpida voluntaryamente o involuntaryamente, mos inche de amargura i mos mete en  estado de revolta.

La Diaspora Djudia eya mizma se topa en la konsternasyon de kontar tantos muertos a la sigida de esta konfrontasyon regretavle de las dos partes.

Entre munchos otros, los djudyos de Turkia syempre partizanos de la paz i la armonia entre los ombres i kontraryos a kualkyer akto de agresividad, se syenten feridos en su sensibilidad i syempre solidaryos de todos los ke muryeron indjustamente.

Munchas institusyones djudias esparzidas en el mundo manifestaron tambyen sus immensa tristeza a la sigida de este drama dolorozo, entre otros el Crif (Conseil Representatif des Institutions juives de France) reputado por su intenso karinyo i kerensya enverso Israel.

Bernard Henri Levi, el mezmo profundamente atado afektivamente al destino de Israel, disho “Esto konsternado, tengo visto la armada Israelyana aktiva en munchas okazyones, eya me paresyo syempre ser una armada ideal de pureza. Oy penso kel Israel ke yo amo, sensivle i  umano, el Israel ke es para mi un sujeto de orgolyo, tenia otros medyos de tratar kon esta situasyon.

Facebook'ta Paylaş
Yazar Klara PERAHYA
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008