gozlemkitap
RSS
Yayın Haftaları X
El Punto Prensipal de las Kuatro Mitzvot de Purim es la Unidad de los Judios
El Punto Prensipal de las Kuatro Mitzvot de Purim es la Unidad de los Judios

Komo lo savemos, Aman empeso la katastrof de Purim reklamando al rey Ahashverosh ke ‘’ay un  puevlo ke estan dispersados en los estados de su empiro, i ke la relijion de este puevlo es diferente de todos los otros puevlos’’.

En diziendo esto, Aman kijo amostrar al rey ke los judios no son unidos i ke estan dispersados. Para provar ke Aman se estava yerrando, todos los judios de Susan se reunioron, izieron tanid i todos endjuntos rogaron al Dio ke los salve.

De esto, estomos viendo ke el punto prensipal de Purim es la unidad de los judios. No solo akel tiempo, mezmo oy, afin de resistir al enimigo, los judios deven de unirsen, deshar de lado sus diferensias, i estar lado kon lado komo un solo puerpo.

Puedemos ver este prensipio de unidad en todas las kuatro mitzvot de Purim. El punto prensipal de las kuatro mitzvot de Purim es la unidad de los judios.

La primera mitzva, ‘Meldar la Megilla’, deve de azerse en un Minyan. Es mezmo preferable de ir a la Sinagoga ande todas las personas estan reunidas, i meldar la Megilla todos endjuntos.

La sigunda mitzva, ‘Mishloah Manot, ke es embiyar dulsurias i regalos a muestros amigos i vizinos, amostra muestra buena voluntad por muestros keridos. Esta mitzva mos aze unir en el korason, en teniendo buenos sentimentos por los otros.

La tresera mitzva, ‘Matanot l’Evyonim’ es dar paras a los menesterozos. Ayudar los menesterozos es amostrarles ke i eyos son muestros ermanos. Esta mitzva forma un ermozo egzamplo de unidad en azendo aserkar los menesterozos a la komunidad.

La kuatrena mitzva ‘Mishtah’ es fiestar el Purim no solo entre famiya, ma kon todos endjuntos. Avrimos muestras puertas, i envitamos muestros ermanos a muestras kazas, porke muestra alegriya es muncho mas grande kuando estamos kon otros. Mas muncha djente en Purim, mas grande es la simha i la alegriya de la fiesta.

Los Purimes de muestra chikes, komo todas las otras fiestas, no se puede komparar kon las fiesta de oy. En kada kaza se topava una Megilla guadrada ke se kitava en medio noche de Purim. En la Sinagoga, kuando se meldava los nombres de los ijos de Aman, todos davan los piezes en basho para ke no se oyga los nombres de muestros enemigos. En komiendo ’los oyidos de Aman’, ke son una forma de biskochos, mos akodravamos de la fin de esta persona ke kijo azer mal a los judios. Los parientes mos davan paras para ke mos merkemos lo ke keremos. Todas las kreaturas ya saviyamos la konseja de Purim, i la kantavamos: ‘Alevanta Mordehai, vistete de sayo, mete korona de rey, suvete al kavayo..’. En los balos de Purim mos vistiyamos kostumes de diferentes personajes para riyir, i se beviya vino para alegrar. Las ke se yamavan Ester aziyan tanid un diya antes de Purim. Las mavlachas, ke es una forma de dulsuria en diferentes formas, se vendiya en las patiserias. La mavlacha la mas tipika era un sesto de dulse blanko kon rigas koloradas enriva, i ariento del sesto se metiya frutas dulses  sekas, i masapan. Muestras madres aparejavan dulsurias ke se yamavan ‘platikos’ para dar a los keridos. En komiendo estas dulsurias, los grandes diziyan ‘De tu dulse de novia komeromos’, o ‘Siempre dulse i alegre ke estemos’. Estas bendisiones ke oyiyamos de los grandes mos aziya grande plazer.

Rogamos ke siempre aunados ke estemos todos los judios del mundo, para pueder estar fuerte enfrente de muestros enemigos, i fiestaremos kada Purim komo todas las otras fiestas kon grande alegriya.

Facebook'ta Paylaş
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008