gozlemkitap
RSS
Yayın Haftaları X
No solo “prova de apresyasyon” ma sovre todo “prova de konfiansa”
No solo “prova de apresyasyon” ma sovre todo “prova de konfiansa”

La  konsternasyon fue grande en el mundo entero en ambezandose  vyernes pasado el 9/10,  la atribusyon del Premyo Nobel a Barack  Obama, eskojido ay manko de un anyo a la kavesa del mas prestijyozo estado del mundo.                 

 Aunke por la mas parte afirmativa, la reaksyon de la prensa eskrita, elektronika i odio- vizual  fue kaji unanima  a afirmar ke este akontesimyento  es muy tempranero, bazado sovre una simple esperansa. Ainda nada fue realmente kumplido... ninguna realizasyon konkreta, ningun arreglamyento de konflito, syempre los mizmos enfrentamyentos sanglantes i el mizmo antagonizmo entre payizes vezinos.

 Nombrozos analistos politikos  konsideran el fakto komo un regalo envenenado echo a  Barak Obama , un regalo ke rendra ainda mas difisil  la governansa de un  payis a mitad refraktaryo  a la politika de su prezidente, bazada sovre “la mano  tendida verso los vyejos enemigos”, “la avyertura al multilateralizmo”, “el esforso kostozo de topar una solusyon ekitable a problemas ke paresian asta agora ser insoluvles”, “su dezeo de paz i no solo de supremasia”. ets...ets..

 Munchos de entre sus adversaryos politikos konsideran sus proyektos  komo provas de flakeza...despues de siglos  de dominasyon , eyos no parvyenen a achetar de renunsyar  al orgolyo de apartener a la primera potensya del mundo. 

 En el fondo, ke fue el motivo imperyozo ke pusho la prestijyoza Institusyon Sueduaza a rekompensar, (kontraryamente a sus uzos i kostumbres)  un ombre ke ainda  no realizo konkretamente  ninguna de sus promesas?

 La repuesta puede pareser inkonsistente, sin real argumentasyon probante , ma la persona no se puede detener de  formular  kestyones .   Al pareser este komite  tuvo el koraje de votar  por un proyekto virtual ke yeva en el “el potensyal  de una mueva konsepsyon de  las relasyones interhumanas”... El voto por un ombre ke supo en poko tyempo trokar  el objetivo de una de las mas grandes potensyas del mundo, un ombre ke aparejo la atmosfera  para la realizasyon de muevos pasos bazados sovre mas de solidaridad humana.

 En su primer diskorso vyernes la noche, despues la atribusyon del premyo, Barack Obama el mizmo manifesto su sorpreza  i konsidero el fakto komo un djesto de enkorajamyento. El ekspreso kon modestia su menester de kolavorasyon de la parte de los otros grandes payizes afin de realizar el trokamyento..

 Es difisil para el shefe de un puevlo delkual kaji la mitad es ainda imprenyada del orgolyo de su superyoridad, de azer entender a sus sitizanos  ke la grandor no se topa esensyalmente en la fuersa, ma en el esforso de ayegar a un nivel de ” respekto del otro” ke solo puedra asegurar la armonia mundyal..

En atribuendo la mas grande distinksyon a  un Ombre ke ainda no pudo realizar ningun proyekto  ma ke  lucha de todas sus fuersas, sin deskanso i puede ser envezes  sin grande esperansa, el Komite del premyo Nobel  kompuesto de personas byen pensantes,  kijo mostrar al mundo ke no es solo el rezultado ke es importante , ma tambyen el enkaminamyento verso este rezultado..

 Barack Obama no pudo  ainda  realizar kompletamente kaji ningun proyekto, ma apronto el terreno... elimino  sino la totalidad, ma syertos  prejuisyos  ke son abitualmente  entrompesos para un renovelamyento del orden sosyal  establesido ...  

 Puede ser mizmo  ke esta distinksyon  ke parese prematurea ,es en realidad una “yamada” a las otras potensyas a unirsen  afin de render el mundo mas umano  i los ombres  mas avyertos los unos a los otros.   

Facebook'ta Paylaş
Yazar Klara PERAHYA
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008