gozlemkitap
RSS
Yayın Haftaları X
Es ke semos enteramente responsavles de muestras pulsyones?
Es ke semos enteramente responsavles de muestras pulsyones?

Ke seamos jeografikamente serka o leshos, etnikamente semejantes o sin ningun punto komun, amigos o enemigos, todo lo ke akontose a un ombre, en ke lugar del mundo ke sea, mos konserna.

 Aunke de apartenensya relijyoza o sosyal diferente, en varias sirkunstansyas reaktamos munchas vezes de la mizma manera ke una persona ke ovedese a dogmas o objektivos kontraryos a los muestros, komo si un  mizmo potensyal de reaksyones fundamentales gia muestros pasos o muestros djestos.

Sean lo ke sean los puntos ke mos desferensyan los unos de los otros, semos todos sometidos al mizmo kodigo egzistensyal, a las mizmas pulsyones afektivas de baza, a la mizma esperansa i al mizmo espanto.

Es por esto ke todo lo ke konserna kualkyer persona  mos konserna tambyen.

Ansi, no me puedo rezinyar a deshar en el silensyo un evento ke se paso Martes la noche de la semana pasada ....un terrivle drama ke akontesyo en una chika sivdad de Korsika.

Un adolesente de 15-16 anyos mato sus dos djenitores ansi ke sus doz ermanikos en sus eshuenyo, kon un fusil (tufek) de kasador ke apartenia al padre .

Despues de aver vagado durante 24 oras en espasyos dezertikos afuera del baryo ande morava, sovre la sugjestyon de un paryente ke enkontro por azardo,  el se entrego a la polisia i konfeso su krimen...El dize akodrarse de su akto ma no de la razon ke lo pusho a perpetrarlo...l

Sin ningun presedente judisyal ni psikyatriko, ijo de una famiya onoravle muy unida entre sus myembros i sin problema vizivle, ekselente elevo de tresera klasa de liseo, esportivo, de karakter amavle i kara sonriente, nada deshava preveer su djesto fatal.

No era un  djesto  de violensa perpetrado en un momento de ravya...ni un akto de otodefensya lejitimo ... las viktimas fueron matadas en sus eshuenyo.No era una akumulasyon  de rankor, los vizinos avlaron de una famiya unida sin problema  mayor, eyos dizen mizmo kel matador era un adolesente  ke paresia kontente de la vida, muy atado a sus djenitores.

Entonses, kual es el motivo ke pusho este manseviko a kometer este  akto irrreversivle? A ningun momento el no nyego su responsabilidad, al kontraryo (uniko djesto de ultima dezesperansa despues de aver todo destruido) el se entrego a la polisia kon su propya voluntad, despues de aver rodeado en espasyos asolados...

Ke pudo ser esta fuersa (mas fuerte ke su amor por las personas ke le eran las mas serkanas) ke lo pusho a kometer el djesto fatal? Ken armo su braso? Ken le insuflo este impulso imprevizivle ke lo ovligo  a kaji todo derrokar en su entorno sin portanto pusharlo al suisidyo?.

Uno de sus amigos avlo de una prezensya indifinisavle kel matador sentia envezes al lado de el.

Eske se trata de un akto de lokura pasajera? Los inspektores  kon los kualos el manseviko se topo en kontakto no relevaron ninguna  anomalia de komporto, salvo un estado de shoke  komprensivle en semejantes kavzos.

Los psikyatros i psikologos puedran puede ser dar una repuesta a lo ke mos parese ser un misteryo de la natura...i tambyen el rezultado de las analizas ke fueron echas afin de ver si el manseviko avia prealablemente tomado una kualkyer droga.

Mizmo la influensa ke puedran tener los “djugos elektronikos o los varios filmos ke vemos a la televizyon” es estudyada. Ma, por el momento, desde myerkoles pasado la noche, el drama guadra su sekreto.

Kestyones espantavles mos vyenen al tino: “Eske una atraksyon  morbida verso la dezgrasya se topa envezes en la kriansa umana, asta anihilar su kapasidad de djuzgar?”  “Es ke se trata de un akto de nihilizmo absoluto, de un menester inkomprensivle de todo derrokar al entorno de si, sin portanto renunsyar personalmente a la egzistensya?”.

Deke esta frajilidad  en el ombre? Deke sovre todo esta prekaridad de la vida? komo una eternal insertitud  a la kuala  la kriansa pensante es kondenada.

Ke puedra ser el verdikto  del djuzgo? Los raportos medikales desideran.

Mas grave, ke sera su propyo verdikto kuando el va salir del estado de shoke en el kual se topa en este momento?

Facebook'ta Paylaş
Yazar Klara PERAHYA
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008