gozlemkitap
RSS
Yayın Haftaları X
Letra... o telefon?
Letra... o telefon?
“En jeneral, los savyos eskriven mal las letras familyalas, komo los bayladores azen mal las reveransas...” - Voltaire

Mizmo en eskrivyendo letra, ay syertas reglas elementaryas. Si es a un intimo, komo empesar? Simplemente “Kerida tala o talo” (nombre del destinateryo). No kale olvidar ke avlando tenemos la shans de apoyar (desteklemek) muestros byervos kon mimikas i mizmo kon repetisyones. Muestro interlokutor (muhatap) al menester, demanda eksplikasyones si no entendyo byen lo ke dizimos. En eskrivyendo es diferente. Dinguna shans de repetar o dar eksplikasyones. Si se puede dezir ansi, no ay, al momento, posivilidad de “tresladar” lo ke se eskrive. Dunke, devemos esforsarmos a emplear palavras simples, entendidas fasilmente.

Oy, la mayoriya de las korrespondensyas  se estan azyendo kon komputer. Ma todos no tyenen esta posivilidad i fasilidad. Si la letra es manuskrita, lo ke uzimos anyos i anyos, i uzamos munchos, oy en diya, es importante de tener una kaligrafiya lizivle. Djusto el momento de kontar una anekdota. “Una dama resivyo una letra ke no pudo meldar. La yevo al farmasyen dizyendole:  “Vos rogo de deshifrar esta letra, syendo ke ya sosh auzados a las eskrituryas kaji illizivles de los medikos!” (devo  aklarar ke no todos los doktores eskriven ansi...) El farmasyen le disho a la dama de pasar mas despues. Vyene oras de tadre i ve al farmasyen kon dos botizikas de “pomada” i un bokaliko de “shurup”: “Vuestra resefta esta pronta, Sinyora!!..”

Letras para amigas se pueden eskrivir mas o menos komo se avla,  naturalmente, sin  entrar en detalyos minimos.Lo razonavle es konsentrarse, i ampesar despues de ser siguro de lo ke se kere eksprimir. Los byervos ya vyenen unos detras d’otro. Me va permeter de dar un konsejo: “Perkurad a eskrivir letras komo las ke vos plazeriya resivir. Kuando se trata de letras ofisyel, ay una regla estrikta: Atakar de vista el sujeto prinsipal.

Vinyendo al telefon... Munchos pensan ke si uno tyene telefon, es para utilizarlo kuando kere. Es un punto de vista, ma no el miyo en todo kavzo. Otros pensan ke el empleo del telefon en vezes kavza chikos problemas. Yo por egzempyo, syempre tengo un momento de ezitasyon, una entravadura, kuando devo aboltar un numero. Es komo un reselo de deranjar. A syertas personas se reprosha de avlar muy largo, myentres ke otros kurtan muy kurto... Komo ke diga? Murmurean unos dos byervos, lo ke en vezes es afilu un poko grosyero. Kualo es lo derecho?

Antes de todo ne se pyedre nada de ser byen elevado. El preteksto ke no mos estan vyendo no es una razon. Entre intimos, ya es verdad ke las konversasyones se alargan un poko. Esto deve tener limitos. Naturalmente en un apelo profesyonal, es preferavle de ir direktamente al sujeto. Devemos konvenir, el telefon es invento de grande importansa. Tambyen a mi idea, es komo una intervensyon a la vida de la djente. Puedesh pensar ke esto egzajerando. Respekto vuestra opinyon. Kuantas vezes mos tyene kombinado de bushkar un amigo, ke jeneralmente es amavle. Si el mos responde kon un si, kon un no, kon repuestas evazivas, devemos entender ke no esta en pozisyon de konversar. Es a mozotros de kortar, sin apuntarmos. Avra okazyones mas despues de avlar...

Syertos avlando, azen mimikas, komo si el de la otra linya esta vyendo. En realidad es el tono de muestra boz, las palavras ke eskojemos ke deve impresyonar, sin olvidar ke el “mikrofon” egzajera las intonasyones. No vos olvidesh ke los byervos son komo los minutos ke pasan. No tenemos shans de tornarlos atras. Keridos amigos, no agash asperar en baldes los ke vos bushkan kon telefon...

Facebook'ta Paylaş
Yazar Coya DELEVİ
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008