gozlemkitap
RSS
Yayın Haftaları X
Akseptar de ir verso lo ke mos parese ser la Verdad
Akseptar de ir verso lo ke mos parese ser la Verdad
“Sinyor,dame la trankilidad de esprito de akseptar lo ke no puedo trokar, la fuersa para trokar lo ke se puede trokar i la saveduria para disernir el uno del otro” (Marc Aurel)

No se egzaktamente por ke razon pensi muncho i mizmo tuve un largo momento de ezitasyon antes de eskrivir este artikolo al sujeto de la muerte de Soeur Emmanuelle del orden relijyozo “Notre Dame de Sion”. ...puede ser una vyeja retisensya  transmetida a travers  diferentes jenerasyones en mi famiya naturalmente  tradisyonalista..

Ma las semanas pasando , devo konfesar ke mi konsensya de simple “ser pensante” me pusho (kuala  sea la fey ke Soeur Emmanuelle eskojo  libremente) a azer el elojyo  del eksepsyonal lavoro umanitaryo ke eya kumplio durante su vida..

Munchas damas de muestra kolektividad se akodran por seguro de eya ke durante 40 anyos ensenyo en el Liseo Fransez ke yeva el nombre de la mizma  kongregasyon. Una persona de una semejante valor etika, yena de kompresyon por la sufriensa “del otro” desha inevitablemente trasas en la memorya de los ke tuvyeron la okazyon de enkontrarla.

Despues de aver kumplido su dever de edukadora en muestra sivdad, a una edad bastante avansada, Soeur Emmanuelle emigro en Ayifto ande durante 20 anyos eya no solo lucho kontra la ekstrema provedad ke se topava en algunos baryos de este payis, ma tambyen insistyo a partajar la vida de los “handrajeros” ke bivian aya...

Eya moro en una de las chosas ande eyos moravan, komyo lo ke eyos komian i bevyo la agua ke eyos bevian. Esto no solo por esprito de sakrifisyo ni  de otopenitensya, ma para konoser en su absoluta totalidad esta terrivle mizerya, afin de pueder mijor kombatirla.

Ansi, pudyeron ser kreados munchos sentros de formasyon edukativa, munchas eskolas i tambyen numerozos establesimyentos medikos ke salvaron la vida de numerozas personas ..

A un djornalisto de la revista Franseza “Le Point”  ke la avia intervyuvado kuatro anyos antes de su muerte, Soeur Emmanuelle avia dicho lo sigyente.

“Yo fui la persona la mas oroza del mundo; kale eskojer entre la felisidad i el plazer. “El plazer” es un kondjunto de gozos immedyatos, “la felesidad” demanda de renunsyar a algunos plazeres, la felisidad tyene en eya una syerta severidad.... Un dia debasho mi velo de relijyoza, en la eskola ande profesava, enkontri un ombre a mis ojos ekstraordinaryo. Un profesor briyante, muy intelijente...teniamos la oportunidad de avlar entre dos korsos de literatura o de filozofia.... me ambezi muncho de el... i, el espasyo de un momento, me dishe: ‘he...he...el me plaze muncho, puedriamos puedeser bivir endjuntos’.

Fueron momentos muy duros para mi ke avia pronunsyado mis votos relijyozos...enfin  tomi la desizyon de avlar kon una kolega bastante aedada, lakuala me respondyo ‘Lo ke resyentes es normal, no es fasil de kedar fidel a una promesa de esta dimensyon... Agora no kedes infokada  sovre tu problema, va,  vijita los ke tyenen menester de tu ayudo, los ke estan en difikultad i sufren’ Esto me salvo”

Tambyen , a la kestyon del mizmo gazetero:

-  Es ke pensash  ke muestra epoka es inhumana?

 eya respondyo:

 - “La palavra ‘inhumana’ no me gusta...enkontri munchas personas ke lavoraron i ainda lavoran afin de ayudar los ke se topan en el apreto.

Para mi, kreer en Dyo es por seguro muy importante. Tengo kon El una relasyon invizivle ke me aze korrer sovre los kaminos, komo si un soplo me pusha verso los otros.., ma, kreer en Dyo no es lo mas importante...lo mas importante es de kreer en el ombre”:

No me pude detener, keridos lektores, de transmetervos estas palavras tan profundas, dichas por una mujer eksepsyonal  ke no es mas de muestro mundo.

No se lo ke fue egzaktamante su fey , ma en todo kavzo, uvo en eya un djenero de umanizmo echo no solo de aktos de solidaridad enverso los otros, ma tambyen de respekto enverso eyos, i mizmo (fruto sin dubyo de una larga interrogasyon de si para si) “akseptasyon de estos otros en lo ke los desferensyava de eya”.

Facebook'ta Paylaş
Yazar Klara PERAHYA
Yazdır Yazdır
Yazdırma Önizleme X Yazdir
Yazdırma işlemini başlatmak için YAZDIR 'a tıklayın.
Arkadaşına Gönder Arkadaşına Gönder
Arkadaşlarıma Gönder X
Abone Formu X
Şalom Gazetesi’nin adresinize gelmesi için bir yıllık şehir içi abonelik ücreti 140 TL.dir.
İletişim Formu X
Şalom Satış Noktaları X
Remzi Kitabevi - Etiler Akmerkez
Remzi Kitabevi - Suadiye
Remzi Kitabevi - Osmanbey
Remzi Kitabevi - Erenköy Carrefour
Remzi Kitabevi - Akadlar Mayadrom
Remzi Kitabevi - Mecidiyeköy Profilo
Remzi Kitabevi - Ankara Armada
Remzi Kitabevi - İzmir
Remzi Kitabevi - Antalya
Şalom Gazetesi - Künye X
künye
Abone Bize Ulaşın Reklam Şalom Satış Noktaları Künye Tüm Hakları Saklıdır. Şalom Gazetesi 2008